Tuesday, June 12, 2012

موقع اباحي ... رجالي

هل تعلم ان البنات لما بتمشي بأي حاجة تدافع بيها عن جسمها، ده معناه انها شايفة نص الرجالة حيوانات والنص التاني كاوركات


هل تعلم ان اختك او مراتك أو بنتك بيخافوا يقولولك انهم اتعرضوا للتحرش علشان أول كلمة هتسمعها منك "أنا قولتلك ماتروحيش هناك" أو "أنا قلتلك ماتلبسيش كذا "


هل تعلم ان اختك او مراتك او بنتك بيخافوا يقولولك انهم اتعرضوا للتحرش علشان خايفين عليك اكتر من نفسهم ومش عايزينك تتخانق علشان متتضربش أو تروح في حديد بسببهم


هل تعلم ان بنات كتير لما بتفكر تدافع عن نفسها بتلاقي اللى يقولها "خلاص بقى ياأبلة"


هل تعلم ان بنات كتير لما بتفكر تدافع عن نفسها بتلاقي واحد "فاشخ ضبه" وبيضحك !!!!


هل تعلم إن الضحكة أو محاولة "فض المولد " بتضايق البنت نفسيا أكتر من التحرش ذاته


هل تعلم ان بنات كتير لما بتفكر تدافع عن نفسها أمها او أبوها بيقولوها اوعي تعملى كده علشان ممكن يكون معاه حاجة يعورك بيها او يرشها عليكي


هل تعلم ان الأب أو الأم ممكن يقولوا لبنتهم "كويس انها جت على قد كده "


هل تعلم ان الرجالة وقت التحرش بيبقوا فاكرين الموضوع خناقة وبيكون اكبر همهم انهم يمشوا البنت من المكان ... ويمشوا الحيوان اللى اتحرش بيها


هل تعلم ان معظم حالات التحرش بتكون حالات جماعية ، وان حالة التدخل من أي راجل بتكون حالة فردية ... ده لوحصلت أصلا


هل تعلم ان البنت بتتربى طول عمرها ان محدش يحط ايده في ايدها غير خطيبها ، لكن في ناس كتير حطت ايدها في كل حتة في جسمها


هل تعلم ان لبس البنات ممكن يكون مستفز بس مش مبرر للتحرش أو انك تاخد مسكة ... علشان في ناس كتير بتمشي على رجلها والبي ام والمرسيدس جنبهم وبيستفزوهم برضه بس مابيفكروش ياخدوا لفة ... وفي ناس جعانة بتعدي على الجزارين ومنظر اللحمة بيستفزهم ومابيفكروش ياخدوا قطمة


هل تعلم ان لبس البنات المستفز هو ده اللى بتاخد عليه ثواب لما تغض بصرك 


هل تعلم ان النقاب بقى بيتحسب من اللبس المستفز وان اللى لابسة نقاب مش عارفة تروح فين تاني  


هل تعلم ان في رجالة كتير بتنزل من بيوتها في المناسبات الزحمة علشان يلحق مسكة وياخد نفسه و يروح تاني


هل تعلم ان السؤال بتاع "هو ايه اللى وداها هناك؟" او "ايه اللى جابها هنا؟"وصل لمرحلة "ايه اللى نزلها من بيتها أصلا ؟"

هل تعلم ان التحرش بيتم كتير مع بنت ماشية مع راجل وانه بياخد نصيبه هو كمان من التحرش


هل تعلم ان الراجل من دول لما بيشوف بنت في المترو مش راكبة مع السيدات بياخدها حجة للتحرش ولو اتكلمت بيقولها مش عاجبك متركبيش هنا

هل تعلم ان التحرش في المترو وصل لقلب عربية السيدات

هل تعلم ان المتحرش لو كان عازب هتلاقى واحد يقولك ده غلبان ومش لاقي يتجوز  

هل تعلم ان المتحرش حتى لو كان متجوز هتلاقى واحد يقولك اكيد مراته مطلعة عينه

هل تعلم ان المعاكسة "المغازلة" غير التحرش خالص ... وانها بتتناسب عكسيا مع التحرش، فين أيام المعاكسة بالصفارة وأيام "ايه اللى نزل الملايكة عالارض؟"

هل تعلم انك لما تغازل البنت ممكن تتبسط لكن لما تسمعها كلمتين قاذورات لا هي هتتبسط ولا انت هتتكيف


هل تعلم ان احنا اول ما وعينا عالدنيا اتعلمنا في مازنجر ان الست صدر وشكرا

هل تعلم انك لما تكون عايش في بلد هي الاولى في نسب التحرش يبقى البلد دي عندها مشكلة في رجالتها مش في بناتها

هل تعلم ان البنات فقدت الأمل في الرجالة وفي الرجولة بسببك وبسببي


هل تعلم إن من هنا ورايح مش هيجيب حق البنات .. غير البنات
............................................


نشرت هذه التدوينة من قبل على فيسبوك هنا
https://www.facebook.com/notes/mohamed-sherief/موقع-اباحي-رجالى/10151549265020296

وأعيد نشرها في يوم التدوين ضد التحرش الجنسي في مصر
https://www.facebook.com/events/377426432307370/378353562214657/?notif_t=plan_mall_activity

3 comments:

لبنــــــــــى said...

نت رائع
اكتر من رائع
مش لاقية وصف للي انت حكيتوا بس يا ريت الناس تسمع
بتعرف لو البمجتمع بيعطي فرصة للبنت تافع عن حالها من غير ما يسلبوها هادا الحق
لو الاهل يدعموا بناتهم بس بكلمة ؟
كان اشياء كتير تغيرت بحياتنا
و حياة اولادنا كمان
تحية

العاب فلاش said...

موضوع جميل بجد تسلم الايادي

السيارات said...

يعطيك العافية