Thursday, March 26, 2009

دراسات

كنت أشاهد أحد البرامج الحوارية على إحدى الفضائيات
واحتدم الحوار على مشروع التوريث
وعلا صوت المتحاورين
حتى لاحظت متابعة أخي الصغير ذو الأحد عشر عاما لما يدور في الحلقة
ثم باغتني باعتراضه على ما يسمعه قائلا
الناس دي متعرفش حاجة ...ابن الرئيس مش هيبقى رئيس بعديه ..إحنا خدنا في الدراسات إن الفرق بين الملك والرئيس
إن ابن الملك هو اللى بيبقى ملك...... لكن ابن الرئيس عمره مايبقى رئيس
لم أحاول أن أعكر صفو حياته بإخباره بحقيقة الأمر وكيف يرتب الساسة لمثل هذه الأمور
هززت رأسي في صمت موافقا على ما يقوله
وعدت مرة آخرى لمتابعة البرنامج ...أنا وأخي
:إلى أن باغتني بسؤاله
هو حسني مبارك بقاله قد إيه بيحكم ؟؟؟؟-
حوالى 28 سنة-
غريبة مع إن مكتوب في كتاب الدراسات إن الرئيس بيقعد 6 سنين بس-
هات كتاب خارجي-

11 comments:

الدرعمي said...

المشكلة إن الامتحان مبيعترفش بالكتب الخارجية بيعتبرها خيانة

روابط said...

أخوك غلبان, بيصدق اللى بيدرسوا فى المدرسة, فهموا بس براحة, أحسن يتفزع

روابط said...

أخوك غلبان, بيصدق اللى بيدرسوا فى المدرسة, فهموا بس براحة, أحسن يتفزع

مصــــري said...

تشي

عجبتني حتة هات كتاب خارحي دي
حوارك مع أخوك
أشبه بحواري مع أخي
الذي يكبر أخيك
فتجده يندهش ثم يعترض ثم تـُصدر الكلمات الأبيحة
وأنأ أقول آمين
بعد درس في الأخلاق كأخ أكبر

قوله ده كلام زي كلام الجرايد
أو خليه يقرأ الأخبار والجمهورية أهو حاجة لايقة علي اللي بيدرسه

أسامة

ماء تشرين said...

اه
فعلا هو الكتاب الخارجى هينفع معاه

بس لازم يعرف انو الكتب دى للمدرسه والمدرسه ملهاش علاقه بالعالم خالص في مصر بس الكلام ده

Anonymous said...

و حياتك كل ما اجى أذاكر الاضواء وسلاح التلميذ والمعلم وكراسة الاول والامتحان ألاقى المرحوم عبد الحليم بيقول
طريقك مسدود مسدود مسدود يا وَلــــــــــــــــــدى

لبنــــــــــى said...

بكرا بيكبر و بعرف شو الحقيقة
زي ما صار فينا
بس ليكبر خليه يحلم

سوبيا said...

بوست حلو اوي
بس احب ابشرك
الكتاب الخارجي
مش هايعمل حاجه
لا ابسلوتلي
لانه
برده من جوا المقرر
والفرق بين المناهج والحياة
زي الفرق بين الظلام والاشد ظلمة
كده كده
مش هاتشوف كف ايدك
ولا ال ايد اللي هاتقلبك في الي فجيبك

Che_wildwing said...

الدرعمي
الامتحان مابيعترفش بحاجة غير انه بيعترف بقدرات السيد الرئيس وغباوة السيد الطالب


أستاذة عزة
تعلمت حتى من قبل الالتحاق بمدرسة القانون
أن القانون ينشئ القوة ويحميها
ثم اكتشفت واقعا يسخر القانون لخدمة الأهواء والأغراض
فإذا فعل أحدهم خطأ ما لابد أن يكون في اطارا قانونيا
وطريقة اعداد القوانين سهلة والتصويت عليها ليس بعملية شاقة
"أو كما يقول البعض "كله بالقانون



حازم سويلم
خليه على عماه
في حكمة بتقول
اعرف اكتر تتعب اكتر



اسامة
والنبي ياعم وفر نصايحك دي لنفسك
قال اخبار وجمهورية قال
طب ما نقريه روزا بالمرة
ولا اقولك نفرجه على حالة حوار
انت غريب يا اسامة



ماء تشرين
لا الكتب والمناهج تتعلق بالواقع والعالم
ولا المدارس تختص بالتعليم



المجهول
هات الاف ام
هتسمع تمورة
وده سكته مفتوحة



جفرا
خليه يحلم لحد مايفوق على كابوس



سوبيا
انا برضه بقول بلاش خارجي ليعملولنا قضية عمالة واستقواء بالخارج

ابن أم الدنيا said...

طب ابن السلطان بيروح فين بعد كده؟؟؟
المشكلة ان احنا ماعندناش لا ابن ملك ولا ابن رئيس.. احنا عندنا ابن *** .. ماعلينا

Isis said...

هوبا دلوقتي بقي عضو في حزب :))