Monday, May 26, 2008

عدنا

رشيد تسلم تقرير جهاز «المنافسة» حول احتكار الحديد في نوفمبر الماضي.. ولم يعلنه إلي الآن
ومع قرارات سيادته إلزام المصانع بتحديد حد أقصي لسعر بيع الحديد من المصانع
إلا أن ارتفاع سعر الحديد لم يعرف التوقف
ويكاد يصل للألف التاسعة
غدا نشاهد رشيد في اعلانات التلفزيون يقول
"بشتغل في حديد عز"
**********
"رقصت دينا في مدرسة "دي لاسال
فتلقت المدرسة إنذارا من وزارة التربية والتعليم
بوضع المدرسة تحت الاشراف المالي للوزارة
فكما للوزارة نصيب في المصاريف
لا تنازل عن النصيب في النقطة
**********
مازال روساء الصحف الحكومية يؤكدون أن ارتفاع الأسعار
يأخذ من الغنى ويعطي للفقير
ويقنعونا بأن السيد نظيف ما هو بأقل من روبن هود
أعتقد أن الفرق واضحا ....وجليا
روبن هود لم يرتدي نظارة طبية
*********
الجميع يريد حل المشكلة السودانية
والجميع يريد انهاء الخلاف الفلسطينى
والكل يهدف لتحقيق السلام في العراق
إذهبوا بالفرقاء إلى قطر

4 comments:

Bella said...

عود احمد

عودة مركة ومتشعبة

حرام عليك

اعلق على ايه ولا ايه

طيب خلينا نبتدي بالحديد اللى جاب لنا انيميا

صراحة لم يتبقى فعلا الا ان يخرج علينا السيد رشيد في الاعلان الشهير ليعلن انه يعمل في حديد عز

الله يعز مقداره ومقدار اللى شغله وطلعه يقرفنا

اما بقى موضوع المدرسة فدي حجة من النواب علشان يعملوا نفسهم صاحيين ومفتحين
وهي لو كانت راحت رقصت لهم في المجلس ماكانش حد فيهم اتكلم
قلة ادب وقلة قيمة صحيح

انا طبعا لاادارفع عن المدرسة
ولكني مستغربة الحماسة والحمية اللى اخدت الجميع رغم ان البلد فعلا اصبحت كلها رقاصات بسبب الاعلام الزفت بتاعنا اللى مصور كل ستات مصر راقصات حتى انه ناقص اي ست وكيلة وزارة تروح من الوزارة ترقص للبيه جوزها علشان يعيش مرتاح البال

والحكاية بانت لبتها لما الوزارة اعلنت عن نيتها المبيتة بوضع المدرسة تحت اشراف الوزارة علشان تلم من صندوق النقوط وتعبي وتشيل

جتهم القرف

قال وزارة التعليم قال

اما دور قطر فقد كتبت موضوع عن الريادة والريالة

روح عندي وشوفه

انا فرحانة جدا لدور قطر في حل المشكلة اللبنانية ويارب يحلوا باقي مشاكل المنطقة حتى يعرف كل شخص في المنطقة حجمه الحقيقي ويبطلوا يقرفونا بحكاية الريادة والدور الاقليمي والقرف المعتاد اياه

تحياتي

EGYPT EYES said...

عجبني أنك ذكرت في البوست دينا وقطر ودا لأن الأتنين غاوين رقص طبعا
تحياتي للرفيق

اهو ده عيبه said...

بصراحه مقتطفات فى الصميم
احييك عليها

بالنسبة لموضوع التربية والتعليم مش بعيد تلاقيهم عاملين لايحه جديدة باسماء الراقصات اللى تم انتدابهم للعمل من خلالها
لاحياء حفلات المدارس الحكومية الغلبانه
اللى اكيد هيكونوا درجه عاشرة

تحياتى لك

Che_wildwing said...

بيلا
منورة
بس أحمد مين
وبعدين سيادتك تعلقى براحتك
احنا نطول
بخصوص الهوجة على المدرسة
فمعلش انا مختلف معاكي في مبدأ "هي جت على دي"
أهى الناس بتلاقي حاجة تطلع غلها فيها

وموضوع قطر طبعا قريته عندك
بس برضه الحكمة بتقول اللى مالوش كبير يشتريلو كبير
وربنا يخلى الجزيرة واسكتى بقى وما تفتحنيش في الكلام في الموضوع ده


عيون مصري
منور ياكومراد
رقصة دينا على واحدة ونص
ورقصة قطر على وحدة ونص




داليا باشا
مبروك الاول على كتاب المدونين
نيجي بقى لموضوعنا
عن نفسي انا شايف لو هيحطوا لايحة لراقصات القطاع العام
يبقى لازم يعملولهم كادر
ونسميه كادر الوسط
ولا بلاش الوسط دي لا يفتكروهم تبع الحزب
نسميه كادر عشرة على عشرة أو عشرة بلدي
وأهو زي ماكان في فيلم الراقصة والسياسي
وفيلم الراقصة والطبال
نعمل فيلم الراقصة والجمل