Sunday, February 24, 2008

دليل التليفونات

في ظل غياب نواب المعارضة والإخوان والمستقلين
احتجاجًا على قرار حرمان النائب سعد عبود من حضور جلسات المجلس حتى نهاية الدورة
وفي خلال زمن قياسي جديد قدره نصف ساعة فقط
قام نواب الحزب الوطني بتعديل 19 مادة من اللائحة الداخلية للحزب والغاء 5 مواد
المصيبة هذه المرة أن تلك التعديلات تضعف من سلطة المجلس وتحد منها
منها تعديل يرفع سلطة المجلس عن الجهاز المركزي للمحاسبات ويضعه تحت سلطة رئيس الجمهورية
وإلغاء قيام رئيس الجهاز بعرض تقاريره على مجلس الشعب
وتعديل آخر يحرم النواب من اقتراح تعديلات على مشاريع القوانين المعروضة على المجلس
فقط المجلس يبصم على القوانين
مجرد سؤال
هل أقسم السادة نواب الحزب الوطني اليمين الدستورية على المصحف
!!أم أنهم أقسموا على دليل التليفونات؟؟؟

8 comments:

بطوط حبوب said...

بص يا مان انا من زمان وانا متابع بوستاتك سواء فى زعتر او هنا
وعمرى ما علقت لا هنا ولا انا مسجل اصلا فى زعتر بدخل من غير تسجيل او بتسجيل اختى فبطعا مش بعلق
وكيد فى اسباب ابسطها انى مبحبش اشوف الدنيا سوده - رغم انى عارف انها سوده
وكمان انت هتلاقى تفكيرى مدى على سلفى شويه وانت بتكرهم موووووووت ومصمم تسمهيم وهابيين
بس البوست ده مقدرتش امسك نفسى وقلت اقولك انه عجبنى
وكنت هقول ده من غير ما اسجل ومن غير المقدمه الطويله دى بس مش عارف ليه كتبتها وليه سجلت

Che_wildwing said...

بص يادكتور حودة
كلامك بجد أسعدنى كثيرا
أنا على فكرة من الناس اللى مابتحبش تشوف الدنيا سودة
بس زي مانت قلت هي فعلا سودة
يبقى ليه نلونها
وبعدين وضعية النقد هي اللى بتخليك تعمل كده
وعلى فكرة أنا مبنقدش الحكومة بس أو كل مختلف معايا
أنا ممكن أنقد حتى نفسي وحتى منهجي
ولو متابعنى في زعتر أو هنا ممكن تستنتج ده بسهولة
وعلى فكرة
أنا لا أكره السلفيين
فكلنا سلفيين
وإنما أكره احتكار الدين لصالح طائفة معينة تقول نحن السلفيين والباقى غير ذلك
فكل جماعة تقول على نفسها أنها طريقة سلفية
وكل حسب وجهة نظره
وصدقنى المسألة ليست أكثر من مجرد اختلاف في وجهات النظر
ولا تصل للكره
مش عايز أقولك إنى ليا اصحاب كتير سلفيين وادافع عن نفسي بالحوارات بتاعت صاحبي المسلم وجاري المسيحي والافلام دي
بس فعلا أنا ليا أصدقاء كتير منهم
وحتى في دراستي وشغلى وفي الجامع بتعامل مع ناس كتير منهم
ولا أناصب أحد العداء
بس هي العملية زي ماقلنا في الاول
اختلاف في وجهات النظر

على العموم منتظرك في بوستات جاية ان شاء الله وتنورنا في أي وقت

Bella said...

دول لو كانوا اقسموا على دليل تليفونات كانوا احترموا الدليل شوية وماعملوش المهزلة دي
ولاكأنهم ناويين يدخلواا موسوعة جينيس للارقام القياسية

هو احنا لسه شفنا حاجة
دي سلسلة لتمهيد الارض للتوريث والموضوع ماشي تمام

ربنا يريحنا منهم كلهم

Che_wildwing said...

بيلا
على دعائك نقول
آمين

ibn nasser - ابن ناصر said...

يا صديقي انهم لم يقسموا علي المصحف او الدستور أو حتي دفتر التليفونات .. انهم أقسموا علي شيء واحد اجمعوا عليه جميعا
علي (( دفتــر الشــيكات))!! وموضوع متميز
تحياتي

Che_wildwing said...

كلامك مظبوط يابن ناصر
دفتر الشيكات
اهي دي بقى كلمة أبرك من عشرة
سعدت بوجودك ونتمنى دوام تكرمك بالمتابعة

بطوط حبوب said...

انا قلت اكتب فى التدونيه دى عشان مش كتير يقروها
كنت بقولك بقى انى شايف انك بتكرهم وهضرب لك مثال واحد الى فاكره
ايام ازمه الشيخ وجدى غنيم كان كل تعليقك
ابحث عن الوهابيين
على فكره انا مش بناقش افكارك او تناقش افكارى انا بس بستوضح
وعلى فكره فعلا بيعجبنى رايك فى حااجات
كتيره اوى
بس كنت خايف ان الموضوع يقلب بصدام وانا مش بحب الصدمات

Che_wildwing said...

أهلا بيك مرة آخرى يا دكتور
والله يا سيدي الفاضل ما بكره حد خالص
هو بس اختلاف مع المنهج ممكن يكون بشدة شوية
وأنا أعترف بأنى أكون حاد الطباع حين الاختلاف بصورة لا يتوافر معها الود بصورة كافية ساعة الحوار
وبعدين موضوع الشيخ وجدي غنيم لو راجعته هتلاقى فعلا ان اللى عمله المشكلة دي شيوخ السلفية
أنا لا أعرف التجني على أي شخص مهما اختلفت معه
وبعدين صدامات ايه وبتاع ايه
خلى الكلام ده للناس الصغيرة

نورتنا مرة تانية
وأتمنى دوام زياراتك