Monday, July 30, 2007

زيارة الست

في أحد الأحياء التى تشرفت بزيارة السيدة سوزان مبارك ذاك سكنى

وما حدث للحى الذي أسكن فيه ذاك حديث أهل الحي

يتميز الحي الذي أسكن فيه بقدر وافر من الهدوء والراحة النفسية والكثير من الأمن

إلا انه في الفترة الأخيرة اختفى كل هذا وحل مكانه

قلق في مجرد النزول إلى الشارع في وقت متأخر

ومقالب زبالة بعد أن تعاملنا مع الشركات الحكومية ذات الفاتورة المضافة على فاتورة الكهرباء

وظلام كبير تحس ساعة تدخل الحي أنك تزور أحد أفلام هيتشكوك مما أكثر من تواجد لصوص السيارات والسادة المتكيفيين

لم يهدأ رجال الحي وطالبوا رئاسة الحي باتخاذ الإجراءات اللازمة لإرجاع المنطقة لعهدها السابق

وكالعادة لا مستجيب

طلبنا أن تهتم شركة النظافة بأن تأخذ بعين الاعتبار المكان التى تجمع فيه القمامة
واستجابت شركة النظافة هذه المرة وغيرت المكان وألقت بالزبالة في عرض الطريق

وكان في أعمدة إضاءة جاهزة بس يادوبك الأنوار واللنض"حلوة اللنض دي" محتاجة للتغيير بعد أن انتهى عمرها الافتراضي

وكالعادة لا مستجيب

حتى شركة الغاز حين أنهت أعمالها تركت الشارع بنقره ودحاديره الناتجة عن أعمال الحفر لتوصيل الغاز

وطبعا الحي يقولك أصل دي مشكلة شركة الغاز مش مشكلتى

حتى أن المسجد القديم حين نوينا توسيعه واصلاحه لم يمد الحي يد المعونة في اعماله وحتى حين انتهت الاعمال في المسجد طلبنا من يأتى ليزيل بقايا البناء والردم واللذي منه

وهذه المرة كانت كسابقتها ولم يستجب أحد أيضا

ثم كافأنا الله على طول صبرنا وقررت السيدة سوزان مبارك زيارة المدرسة الموجودة في الحي

ومن ساعتها اختفت منطقتى التى تربيت فيها وظهرت منطقة أخرى

منطقة تقترب في جمالها ونظافتها من شانزلزيه باريس

أعمدة الإضاءة لم يتم اصلاح مصابيحها فحسب

بل أزالوها وركبوا أعمدة جديدة بإضاءة أقوى وأصبحت ترى الشارع في عز الليل ولا كأن النهار في أبهى صوره

مع إن أعمدة الإضاءة لم تكن بحاجة الى تغيير بالكامل فقط محتاجة إلى بعض الاصلاحات

لكن وماله خلى الناس تفرح

في يوم آخر لقينا الحى يتنازل عن مبادئه المعروفة عنه وأرسل سيارات السفلتة والتلميع والترويق وغطط كافة شوارع الحى

مع القليل من اضافات الأرصفة الناقصة ووشين بياض للعمارات وزينة وورد وبمب وصواريخ ودلعوا الشارع آخر دلع

وفي أقل من 40 دقيقة كان الردم بتاع الجامع في خبر كان بواسطة عدد لا يقل عن 50 عاملا من عمال الحي

وشركة النظافة اعتبرت لآدمية ساكنى الحي وجمعت زبالتها ورشت الحاويات بالمبيدات والملمعات

وتم مسح الشوارع من كل ذرة تراب ومعرفش جابوا الميه دي كلها منين مع إن الميه قاطعة عندنا كل يوم حوالى ال12 ساعة في ال24 ساعة

وانتشرت في المنطقة روائح عطرة بعد أن كنت تميز المنطقة من زبالتها

غير اليفط اللى اتعلقت تشجع شباب وأطفال المنطقة على القراءة ضمن مشروع الثكافة للجميع

وصور الست اللى ملأت الأرض والسماء

والمدرسة التى أسست من جديد وعادت عروسة كعهدها الأول

ورئيس الحى الذي رأيناه ولأول مرة في تاريخ منطقتنا

ولكن للأسف رأيناه في وضع مخز وهو يكنس ويمسح معمل الحاسب ومكتبة المدرسة

كل هذا حدث في ليلة وضحاها

أو تقدر تقول في يوم وليلة

مش هنتكلم عن رجال الأمن اللى احتشدوا بغرابة في المنطقة وفرضوا عليها حظر التجوال وساعتها معرفتش أجيب الفطار من السوبر ماركت اللى قدام بيتنا عدل

والناس اللى معرفتش تصلي الظهر

والشباب اللى مش عارفين يا عينى يلعبوا كورة

وعم على جارنا مش عارف يظبط الدش عشان كان فيه واحد قناص فوق السطح

مش هنقول على الحاجات دي

بس نتكلم شوية على الاهتمام المفاجئ

لماذا لا يقوم كل من يملك سلطة أو مركزا يخاف عليه بما عليه قبل أن تحدث الواقعة ويطب عليه الريس ولا الست

هل لا يكفى وجود آدميين يعيشوا في هذا الحي ليقوم كل بعمله على الوجه الأكمل

نحن لم نطلب الكثير من الحي

وحين جاءت الست عملوا اللى كنا عايزينوا واللى مش عايزينو وساعتها لم نكن سعيدين بل ازددنا حزنا على حزن

حين عرفنا أنه لا اعتبار لوجودنا أياما وشهور وسنين في المنطقة

ومدى التقدير لزيارة الست يوم واحد كل خماشر سنة وزيادة

أحب أوجه كلمة للسادة المسئولين

القيادات كلها راضيين عنكوا ومبسوطين منكوا وبيبعتلكوا السلام والتحية

ولكن اعلموا حين يذهب كل إلى ربه

لن تجد شفاعة لهذا التقدير أو الانبساط من اللى فوق

هتلاقى اللى تحت مطلعين عينك بإذن الله في الآخرة

وفي الدنيا برضه
لما تلاقى نفسك
على المعاش
ولا الكبير يقابل وجه كريم
ويأتى كبير غيره
ولا تجد من يرضى عنك
فوق
أو
تحت

4 comments:

dina said...

bgd 7alw moot aly anth katbh dah 10/10 excellent bs ya shery ana aro7 feen mn b3dk lw at7bst w dah akeed hay7sal b3d alklam algamil dah aly ana 2olth bs tab3an ana m3ak kol dah sa7 w ana a7s beh zaiek 3lshan a7na geran

dina said...

bgd 7alw moot aly anth katbh dah 10/10 excellent bs ya shery ana aro7 feen mn b3dk lw at7bst w dah akeed hay7sal b3d alklam algamil dah aly anta 2olth bs tab3an ana m3ak kol dah sa7 w ana a7s beh zaiek 3lshan a7na geran

adel said...

شفت ياشيري فيلم جواز بقرار جمهوري الريس لما جه الزرع طلع والمنطقه بقيت انضف من الرحاب زي اللي حصل في حي السلام .........
السيدة الاولي جت بقت السلام سيتي بالاس وياريتها جت عشان حاجة مفيدة دي جت عشان القراءة للجميع 24 مليون عشان القراءة وفي اكتر من 56 مليون شاب مش لاقين سغل ياصباح الهيافه .........وعجبي ياشيري

kol-eldonia said...

يابنى الريس يجى او حرمة تيجى الخير يجى معاهوم دى حاجة معروفة لانه و قد صدق المثل القائل الخير على قدوم الواردين و مبروك عليك يا مان و الحمد للة انا الريس بيجى عندى المنطقة كتيرر علشان كدة على طول نظيفة