مش عارف لحد امتى هنفضل كده
مش عارف لحد امتى هيفضل المصري كل يوم شبه اليوم اللى قبليه
بنفس مآسيه
وبنفس أوجاعه
وتبيكال آلامه
هل أصبح المواطن المصري للأسف جبلة
أم هل انخرم طوق النجاة
أويمكن عجلة التقدم فست
ياناس اصحوا بقى
فوقوا من هذا الثبات الاعظم في الكون حسوا على دمكوا
هى دي مصر بتاعتنا ولا مصر خلاص راحت عليها
فين الناس اللى تقدر تقرر مصيرها
زي مابنسمع في الافلام
فين شباب الجامعات المصرية
اللى كانت نشاطاته متفجرة قبل العصر المباركي
فين الاحزاب اللى تأسست عليها معانى الثورة المصرية
فين الناس اللى بتعرف تقول لأ
ولا كلو ركبوا عفريت أيوه حاضر طيب
واحد رافع ايده هناك وبيسألنى واحنا نعمل ايه يابيه
اقوله ياسيدي اعمل اي حاجة مفيدة
هناك الف طريق وطريقة للاحتجاج المدنى
وهناك ملايين الطرق للتعبير عن رأيك دون إيذاء الآخرين
سواق تاكسي مرة قالى : الحكومة خلت الناس تفكر في اكل عيشها بالعافية يبقى ايه اللى هيخليهم يفكروا في السياسة ووجع الدماغ
بص يابنى ياللى رافع ايدك
بص يا اسطى السياسة دي مش وجع دماغ والكلام في السياسة مش عيب ولا حرام
ولما يبقى ليك رأي في اللى بيحصل في بلدك انت كده متختطيش الحدود
أنا عارف ان الناس خايفة من المعتقل واللي بيحصل في المعتقل من فرج وصحابه
بس يا اخوانا الكلام ده لا يمكن يتم مع جماعة الشعب
يعني مش هنصحى من النوم نلاقي محافظة المنوفية مثلا محبوسة كلها
عشان قالوا رأيهم بصراحة
مش هنقوم من ليلتنا نلاقيهم بيعتقلوا كل سكان البحيرة
في واحد تاني بيرد يقول ياعم عايزين نربي العيال
بص يابو العيال لو انت فرحان بتربية عيالك على الحالة دي
يبقى انت لا مؤاخذة كده بتربيهم اوسخ تربية
تربية ايه لما الواد ابنك يفضل يتعلم 16 سنة
وبعد كده ييجي يشتغل ميلاقيش شغل
ايه متقوليش يشتغل اي حاجةعشان انت كده هتكون مبتحترمش ابنك
ولو انت محترمتش ابنك مش هيحترمك وبكده فعلا هيبقى فسد ولم تصلح تربيته
تربية ايه اللى بتقول عليها لما يدخل جامعة يعرف انه لو كح بصوت عالى ممكن يتفصل من الجامعة لاسباب امنية
تربية ايه لما يروح يعمل بطاقة انتخابية ويحس انه راجل ويدخل الانتخابات يلاقى السادة المرشحين بيقدموا رشاوى انتخابية
وتقولى تربية
ياعم صلي
طبعا انا عارف ان ناس كتير بتسمع الكلام من هنا ويخرجوه من هنا
زي مانصحوهم في البيت
بص ياعم الحاج قضيها كل يوم شبه اللى قبليه
واوسخ من اللى قبليه
انزل كل يوم اطحن في المواصلات لو لقيتها اصلا
روح مدرستك ولا جامعتك ولا شغلك
وبطل تتكلم في اي حق من حقوقك
وسيب مديرك يلطش فيك وخلي حالك يصعب عالناس
وارضى باقل قليلك مع علمك وامكانيتك
وروح بيتك في نفس المواصلات المقرفة
واستنى لما البيه امين الشرطة يعطلك في الطريق
وياخد اتاوة من السواق
واتعرض لكمين يفتشوك فيه ياعينى مع انك محترم
وخش بيتك كلك لقمة ونام واصحى اتفرج عالوصلة ويوم التلات متنساش تتفرج عالمصارعة
ويوم الخميس لاعب مراتك حبتين بعد ما تسرح العيال في الشارع
واصحى الجمعة استحمى وروح صلى
وادعي وقول اللهم أهلك الظالمين بالظالمين وأخرجنا من بينهم سالمين
وامانة امانة امانة سلملى عالمترو
وبلغ كل من تراه ان الناس اللى بتحس بجد مش هتبطل احساس
وهتفضل تطالب بحقوقها وحقوقكم
عشان هما بيحبوكوا ويقدروكوا اكتر من نفسكوا
Posts
5 comments:
لحد ما الناس تخاف على الناس
لحد ما المصرى يحب المصرى
وفى الاخر لما نحب مصر
فعلا المصري أصبح لا يهتم الا بالمصارعة يوم الثلاثاء واللعب يوم الخميس
ياتشي يا خبيث
جيت على النقطة المظبوطة يا تشي
الجمهور المنفض
عارف الجمهور اللى ما بيحبش الكورة بس رايح الاستاد عشان يتفرج على البنات
أهو الجمهور المصري
منفض عشان عنده اليقين ان ده مش مكانه
الشعب المغلوب على آمره لا يستطيع الحراك
المصري أصبح مطاطي
المصري طاطا لحد ما اتركب
الناس متقدرش تعمل حاجة
انتوا بتنفخوا في اربة مأطوعة
Post a Comment